CHASHMISH . . .
Raja ek bhut hi shant rahne wala seedha sada bachcha tha, 6th class ka bachcha
apni umar ke lihaz se bhut hi samjhdar tha, shayd is samjhdari ki vajah se hi
Raja ki eye sight weak ho gyi thi, Uske papa chahte the ki wo eye test karva ke
chashma banwa le par Raja is baat se darta tha ki sab use Chasmish kahege. Par
ek din uske papa ne zabardasti uski eyes test karvake chashma banva hi dia. Ab
kya tha, Raja to bas bhut hi gussa ho
gya par ye uski bhalai ke liye hi tha, bina chashme ke use bhut pareshani hoti
thi.
Shuru me to Raja chashma sirf class me black-board se copy karne ke liye
hi lagata tha par phir doctor ki salah pe usne har waqt lagana shuru kar dia,
aur jaisa ki use darr tha, uske aisa karte hi sab use Chashmish kah kar chidane
lage. Abhi do din hi huye the Raja ko chashma laga kar school jate huye ki ek
din Raja school se rota hua ghar aaya aur aage se school na jane ki zid karne
laga kyuki use sab log Chashmish kah kar chidate the, to uske mammi papa ne bhi
socha ki do-teen din ki school se chhutti kara dete hain shayd iska dimagh sahi
ho jaye.
Raja sham ko apni chhat par khada udti huyi patange dekh rha tha tabhi
uska chashma ek zor ki aawaz ke sath toot gya aur Raja ko dikhna band ho gya wo
fauran mammi ke paas bhaga aur unhe dikhane laga ki uska chashma toot gya hai,
par uski mammi ne dekha to chashma bilkul theek tha unhe laga ki ye chashma na
lagane ke liye bahane bana rha hai to use ye kah kar taal dia ki wo uska vaham
hoga. Agli subah Raja ne mooh-hath dhokar jaise hi chashma lagaya to use aaine
me uski jagah kisi aur ko shaql dikhi, wo shaql ek us hi ke barabar bachche ki
thi jo ek toota hua chashma lagaye tha uske chahre pe gussa tha aur uski aankhe
Raja ko ghoor rhi thi,usne ek dum se chashma utar dia, aankhe sahi se ponchh
kar dobara lagaya to phir wahi shaql dikhi, wo darr ke mare waha se nikal kar
bhaga to achanak papa se takra gya, papa ke puchne par btaya ki use aaine me
kuch dikh rha hai to uske papa dobara use aaine ke samne le gye aur chashma
lagane ko kaha, is baar jab usne chashma lagaya tab vaisa kuch nhi dikhayi dia.
Uske papa ne use datna shuru kar dia wo chashma na lagane ke bahane banana band
krde chashma to use lagana hi padega.
Wo
school pahucha, nazre neechi kar ke chup chap nikalta ja rha tha ki use koi
dekh na le, agar koi dekhega to chidayega, wo class me pahuchne hi wala tha ki
pichhe se kisi ki aawaz aayi "oye ! Chashmish" Raja aawaz sunte hi
ruk gya wo ladka Raja se bhut bada tha phir bhi Raja use ghoorte huye uski
taraf badne laga, wo ladka hasne laga aur use aur zyada chidane laga, Raja uske
paas pahucha aur uski aankho me aankhe daal kar dekhne laga to wo ladka bola
"ghoor kya rha hai chashmish?" Raja ka chashma ek zor ki aawaz ke
sath toot gya par is baar Raja ko koi farq nhi pada balki wo ladka ek dum darr
gya, aur Raja bola "Teri premika bhi to chashmish hai, use kabhi bola tune
chashmish?" Raja ki aawaz me ek sher ki dahad jaisa darr tha jise sunte hi
wo ladka darr kar bhag gya par wo ye soch raha tha ki Raja ko kaise pta ki uski
girl friend bhi chashma lagati hai balki Raja to use janta bhi nhi tha. Idhar
Raja ek zor ke jhatke ke sath hosh me aaya aur khud ko tatolne laga jaise khud
ki talashi le rha ho aur sar khujata hua class me chala gya.
Ek din
baad Raja ek park me ghoomne gya waha
usne boating kari, mammi papa ke mana karne ke bawajood wo ek boat akele lekar
gya, bhut khush tha wo us din tabhi achank usne pani me apni chhaya dekhi par
ye kya wo Raja ki nhi kisi aur ki thi, jo Raja ne aaine me dekhi thi ye wahi
chhaya thi, Raja buri trah darr gya to wo chhaya boli "Raja, mujhse baat
karo mai tumhe kuch batana chahta hu mujhe tumhari aur tumhe meri zarurt
hai." Raja ke paas aur koi raasta nhi tha kyuki wo apne mammi papa se bhut
door tha, Raja ne darte huye paani me jhanka aur usse pucha ki tum kya ho tum
meri chhaya kaise ban gye ho to us chhhaya ne btaya ki, . . .
"Mera naam Sandeep hai. Aaj se ek saal pahle ki baat
hai, mai yaha se kayi kos door ek ganv me rahta tha mai ganv ke pradhan ka beta
tha, humara ganv bhut pichhda hua hai waha na bijli hai na koi naye zamane ki
suvidhaye na vidyalay hai aur na hi koi madarsa par ek baat hai sab bhut hi
sehatmand hain tandrust hain us hi ganv me ek mai tha jise padhne ka shauk tha
mai din raat apni slate aur chaak liye baitha rahta aur kuch likhne ki koshish
krta tha raat ke andhere me kuppi ki roshni me bhi laga rahta tha amma baba
mana krte the ki najar kharab ho jayegi par unki maine ek na suni aur jaha kisi ne kabhi chashma dekha bhi nhi tha
ki kya hota hai sirf suna tha waha mere chashma lag gya kyuki mujhe dikhna kam
ho gya tha, mere baba ne shahar se mere liye chashma banwaya mai nhi lagana
chahta tha par baba ki zabardasti ki vjah lagana pada, sabne mujhe chidana
shuru kar dia mai bachpan se bhut gusse wala tha isliye mera zara si hi baat
sunkar dimagh khrab ho jata tha bhut bura bhala bola maine un logo ko par wo
mujhe humesha chidate hi rhte the mai tang aa chuka tha ek hafte me un ganv ke
kuch logo ne mera jeena mushkil kar dia yaha tak ki mere baba ko bhi chidane
lage, phir ek din jab mere ghar ke aage kafi log khade the aur mai apne ghar ki
chhat par udaas baitha tha wo mujhe ab bhi Chashmish Chashmish bolkar chida rhe
the mai utha aur aage badta gya aur badte badte chhat se kood gya mere girte hi
chashma ek zor ki aawaz ke sath toot gya aur toote huye kaanch ke tukde mere
chahre pe jgah jgah ghus gye aur mai usi waqt marr gya, mere baba ne agle hi
din mere toote huye chashme ko jaha se liya tha waha wapas bhijwa dia par meri
aatma wapas nhi gyi wo mere marne ki vjah yani ki is chashme ke sath jud gyi
aur ab jab tumne ise us hi dukan par se khareeda to mai tumhari chhaya ban gya,
mujhe un sabko samjhana hai ki kisi ki kamzori ka mazaq banana kitna mahnga pad
sakta hai aur isme tum meri madad karoge kyuki tum bhi ab us hi daur se guzar
rhe ho, mujhe to lagta tha ki wo to anpad aur jhahil log hi kisi ki kamzori ka
mazaq banate hain par yaha to tumhare sath bhi yahi ho rha hai to mere ganv ke
anpad aur tumhare shahar ke padhe likho me farq kya hai, koi farq nhi hai hum
dono milkar sabko sabak sikhayege"
Raja ko Sandeep ki har baat bilkul sahi lagi aur usne
usse hath mila lia. Raja apne papa ke pichhe pad gya ki is baar vacation me use
us hi ganv me jana hain kayi baar mana karke aakhir uske papa maan gye aur phir
vacation me us hi ganv me gye aur pradhan se baat karke ganv me khali pade ek
ghar me rahne lage, tab Sandep ne unlogo ko saza dene se pahle apne baba se
milna theek samjha isliye Raja pradhan ke ghar gya aur Sandeep bola "baba
mai wapas aa gya" Pradhan apne bete ki aawaz sunkar bhagta hua kamre se
bahar nikla par waha to Raja khada tha, pradhan kuch samjh nhi paaya to Sandeep
ne use puri baat btayi par pradhan ko vishvas nhi ho rha tha isliye Sandeep ne
wo Chashma dikhakar pradhan ko yakeen dilaya. Pradhan ko yakeen to ho gya pa wo
samjh nhi paa rha tha ki kya kare uski aankho me khushi ke aansu the, tabhi Sandeep
ne un logo se badla lene ki baat kahi jinki vjah se uski jaan gyi thi to is par
bete ki baat Samjhne ki jgah pradhan gussa ho gya wo bola, "tu chashmish
to tha isme galat kya kahte the wo log, tu chhat se kood gya wo teri kayarta
thi ki tu sachchai ka samna nhi kar paya" tabhi ganv ke kuch log pradhan
ke ghar pahuch gye wahi log jo Sandeep ko chidate the unhe dekhte hi Raja ka
chashma vaise hi toot gya jaisa Sandeep ke chhat se koodne par toota tha, sab
log hairan the ki ye is ladke ka chashma aise khade khade kaise toot gya tab
Sandeep bola tumhari himmat kaise huyi mere ghar me kadam rakhne ki tabhi
achank pradhan ne Sandeep ko rokte huye kaha,"Sandeep tu agar badla lene
aaya hai to tu chala ja wapas kyuki teri maut ka zimmedar sirf tu tha aur koi nhi
agar tu apna chashmish hona qubool kar pata to chidta nhi sach to ye hai ki tu
khud se chidta tha isliye log tujhe chidate the , ye zamana us hi ko chidata
hai jo chidta hai tu ek baar in sabko nazarandaz karke to dekhta" itna
sunkar Sandeep ki aankho me aansu aa gye aur ek pachhtawa bhi ki usne aatmhatya
karke apne baba ka dil kitna dukhaya hai. Raja ne Chashma utar dia aur phir wo
bola, "Uncle mujhe maaf kar dijiye ki mai Sandeep ko aapke paas wapas le
aaya par jo hota hai achha hi hota hai aaj mere samjh aa gya ki apni kamzori ko
agar kamzori banaoge to log tumhe chidayege , use apni taqat banao aur sach ko
apnao, aapne sahi kaha hum log khud se chidte hain isliye log hume chidate hain
" Pradhan ki aankho me aansu the
par usne khud ko sambhal kar kaha,"aree nhi beta maafi mat maango par ha
ye to sach hai ki hum jo bhi hain khud ko vaise hi sweekar kre to kisi ke
chidane ka koi asar nhi hoga." Raja ne chashma dobara se lagaya ki Sandeep
agar kuch kahna chahe to kah paaye par wo kuch nhi bola kyuki wo jaa chuka tha
uski aatma ko shanti mil chuki thi, uski aatma darasal badle nhi balki uske maa
baba ke pyar ki vjah se ruki huyi thi maa ka to dehant kuch mahine pahle ho gya
par baba ke pyar ki kami thi jo aaj puri
ho gyi kyuki unhone use aaj pyar se dekh bhi lia aur ye bhi kah dia ki use
wapas chale jana chahiye.
AFTER
VACATION
Raja school me pahucha aur piche se aawaz aayi "oye
Chashmish" Raja ruka, muda aur muskura kar bola, "yes...
boliye" Wo ladka jhepkar bola
,"K ...K...Kuch nhi" aur Raja
muskura kar bola ,"vaise aapko kaise pata ki mera nick name Chashmish
hai?" Us ladke ka muh band tha aur
Raja mann hi mann muskurata hua aage chal dia . . . . . . . . . . .
Respect Yourself , Everyone will Respect you :)
टिप्पणियाँ
एक टिप्पणी भेजें